Құрмет көрсетіліп, обелиск орнатылды

Алматы облысы Көксу ауданының полицейлері қызметтік міндеттерін орындау барысында бақилық болған әріптестеріне арнап обелиск орнатып, олардың жарқын бейнелерін еске алды.

Аудан тұрғындары мен қызметке жаңа келген қызметкерлерге марқұмдардың ел тыныштығы жолында жанын құрбан еткен істерін үлгі етті.
Салтанатты шараға қайтыс болған қызметкерлердің жақындары, облыстық Полиция департаментінің бастығы Мұрат Ұрұмханов, аудан басшылығы, аудандық полицияның жеке құрамы және жергілікті тұрғындар қатысты.
«Алматы облысында 30-дан астам қызметкер қызмет атқару кезінде қайтыс болған. Біз олардың ерлік істері мен жарқын бейнесін ешқашан ұмытпаймыз. Олардың артында қалған отбасына қолымыздан келгенше қолдау көрсетудеміз. Бүгінгі ашылған обелиск олардың аласармас айбыны мен ел тыныштығы жолында құрбан болған ғұмырының мәңгілік белгісі болмақ. Біз оларды қашанда құрмет тұтамыз», – деді полиция генерал-майоры М.Ұрұмханов.
Көксу ауданында екі қызметкер қызметтік міндетін атқару кезінде қапияда бақилық болды. Оның бірі – Ем Георгий Чан-Сикович 1993 жылы қандықол қылмыскердің қолынан қаза тапса, екінші қызметкер Айдын Байсалбаев 2004 жылы күдіктілерді полиция бөліміне әкеле жатқанда жол-көлік оқиғасына түсіп опат болды.
Іс-шара барысында қатысушылар обелиске гүл шоқтарын қойып, қаза тапқан әріптестерін үнсіздікпен еске алды. Тәртіп сақшылары дәстүр бойынша аспанға мылтықтан оқ атып, қаза тапқан әріптестерінің айбынды бейнесіне құрмет көрсетті.
Сонымен қатар, Көксу ауданының полицейлері іс-шараға қатысушыларды қызметкерлерге арналған тир, денешынықтыруға арналған зал және тұрғындарға сапалы қызмет ету үшін ашылған жаңа фронт-кеңсені тамашалауға шақырды.

Алматы облысы ПД баспасөз қызметі

Алғашқы болып пікір жазыңыз

Пікір жазу

Э-пошта мекенжайыңыз жарияланбайды.


*