Әкесін жарты ғасыр іздеген

Алматы облысының тұрғыны қуғын-сүргінге ұшыраған әкесі жайлы мәліметтерді тауып берген полиция қызметкерлеріне алғысын білдірді.

Алматы облысының полицейлері Ақсу ауданының тұрғынына Кеңес Одағы кезінде қуғын-сүргін құрбаны болған әкесі туралы мәліметтерді мұрағат құжаттарынан тауып берді.

Ұлттық қауіпсіздік комитеті облыстық Полиция департаментіне 2014 жылы 8 мыңнан астам мұрағат құжаттарын табыстаған. Облыстың тәртіп сақшылары аталған құжаттарды жан-жақты зерделеді. Оның ішінде солақай саясаттың құрбаны болған азаматтар, Екінші дүниежүзілік соғыста қайтыс болған сарбаздар туралы ақпараттар, фотосуреттер мен ресми құжаттар бар.

«Ақсу ауданының тұрғыны 1905 жылы туған әкесі Ахметқожа Мұсабаланов туралы ақпарат тауып беру туралы өтініш білдірді. Құжаттарды зерттеу барысында әкесі туралы құжаттар табылып, ол кісінің өмірі, соғыста болған жерлері мен жау қолына түскені анықталды. Соғыстан кейін тұтқынға алынып, 25 жылға сотталғаны белгілі болды», – деп хабарлайды облыстық ПД баспасөз қызметі.

«Сол кездегі саясаттың құрбаны болған әкем туралы ақпарат тауып берген Полиция департаментінің қызметкерлеріне алғысым шексіз. Бала кезіміздегі «халық жауының ұлы» деген қара күйе қазір менің отбасым үшін мақтаныш сезімге ұласты. Әкемнің ерліктері туралы оқыдым және фотосуретін алдым», – деді І. Жансүгіров кентінің тұрғыны Ғабит Ахметқожаұлы.

Өз кезегінде полицейлер тұрғындарға репрессия құрбаны болған жақындары туралы ақпарат табу мақсатында хабарласуға болатынын жеткізді. Мұрағат құжаттары ішінен айып парақшасының көшірмесін, үй іші туралы анықтаманы, тағылған айыпты және оны оңалту шаралары туралы құжаттардың көшірмелерін алуға болады. Егер жеке суреттері мен құжаттары болса, ұрпақтарына табысталады.

                                                                                                                                      Алматы облысының ПД баспасөз қызметі

Алғашқы болып пікір жазыңыз

Пікір жазу

Э-пошта мекенжайыңыз жарияланбайды.


*