Басқы бет / «Сақшы» газеті / Жаңалықтар / Экономикалық одақ – дамудың даңғыл жолы

Экономикалық одақ – дамудың даңғыл жолы

 Кеше Нұрсұлтан Назарбаев Ресей Федерациясы Үкіметінің төрағасы Дмитрий Медведевпен кездесті.

Мемлекет басшысы Ресей Федерациясы Үкіметінің төрағасымен кездесуде экономиканың қазіргі жағдайында мұндай басқосудың маңызды екенін айтты.

Д. Медведев Қазақстан Президентіне Еуразиялық экономикалық одақ аясында ынтымақтасудың өзекті мәселелерін талқылауға мүмкіндік бергені үшін алғыс айтып, Қазақстан мен Ресей арасындағы екіжақты қарым-қатынастың одан әрі дамуына сенім білдірді.

– Біз достас Қазақстанның ЭКСПО-2017 көрмесін өткізу барысында жеткен жетістіктеріне қуанамыз. Бұл – шын мәнінде, Сіздер үшін де, жалпы одақ үшін де маңызы зор оқиға. Бүгін біз Еуразиялық үкіметаралық кеңес аясында қазіргі экономикалық мәселелерді талқылаймыз. Жұмысқа қолайлы жағдай жасағаныңыз үшін Сізге алғыс айтамын. Екіжақты қарым-қатынасымыз соңғы жылдардағыдай қарқынды түрде дами түседі деп сенемін, – деді Ресей Федерациясы Үкіметінің төрағасы.

Сондай-ақ, кеше Мемлекет басшысы Еуразиялық үкіметаралық кеңес мүшелерімен кездесу өткізді.

Кездесуге Қазақстан Республикасының Премьер-Министрі Б. Сағынтаев, Армения Республикасының Премьер-Министрі К. Карапетян, Беларусь Республикасының Премьер-Министрі А. Кобяков, Қырғыз Республикасының Премьер-Министрі С. Жээнбеков, Ресей Федерациясы Үкіметінің төрағасы Д. Медведев және Еуразиялық экономикалық комиссия алқасының төрағасы Т. Саркисян қатысты.

Нұрсұлтан Назарбаев Еуразиялық үкіметаралық кеңес мүшелерінің елордаға келгендеріне қуанышты екенін жеткізіп, кездесудің Астана қаласындағы ЭКСПО-2017 халықаралық көрмесімен тұспа-тұс өтіп отырғанын айтты.

– Үкіметтер басшыларының өз мемлекетінің ұлттық павильондарына баруға, сондай-ақ, Қазақстан мен өзге елдердің экспозицияларын аралап көруге мүмкіндіктері бар. Еуразиялық экономикалық одақтың үшінші жыл жұмыс істеп жатқанын атап өткен жөн. Бұл кезең әлемдегі және одаққа мүше елдердің ұлттық экономикасындағы күрделі ахуалдарға байланысты болып отыр. Сонымен қатар, ортақ нарық пен бірыңғай экономикалық құрылым құру басты фактор болып саналады, – деді Қазақстан Президенті.

Мемлекет басшысы экономиканың өсімі елдер арасындағы тауар айналымының артып, өзара қарым-қатынастардың нығаюына тікелей байланысты екенін айтты.

– Біз осы уақыт ішінде дұрыс бағытта ілгерілей алдық деп есептеймін. Қазір орын алып отырған бірқатар мәселеге қарамастан, Еуразиялық экономикалық одақты нығайтуымыз қажет. Алдымызда ел ішіндегі мәселелерді шешіп, өзара қарым-қатынасымызды одан әрі дамыта түсу міндеті тұр. Бұл жұмыстағы негізгі рөлді үкіметтеріміз атқарады. Бұл дегеніміз – экономикалық міндеттерді шешу, мемлекеттер арасындағы өзара іс-қимыл мәселелерін реттеу, – деді Нұрсұлтан Назарбаев.

Соңында Қазақстан Президенті кеңестің бүгінгі отырысы арқылы ұйымды әрі қарай дамытуға маңызды үлес қосылатынын атап өтіп, қатысушылардың жұмысына жеміс тіледі.

Сондай-ақ, оқыңыз

Антқа адал, міндетке мінсіз ардагер

Бүгінгі күні ішкі істер органдары саласында қызметіне қалтқысыз берілгендердің қатары көп. Тәуелсіз елдің осындай тарландарын …

Пікір қалдыру

Э-пошта мекенжайыңыз жарияланбайды. Міндетті өрістер * таңбаланған