Басқы бет / «Сақшы» газеті / Спорт / Чемпионның шеберлік сабағы

Чемпионның шеберлік сабағы

Динамолық спортшы, Рио Олимпиадасының күміс жүлдегері, дзюдодан халықаралық дәрежедегі спорт шебері Елдос Сметов Тараз мемлекеттік педагогикалық институтының спорт кешенінде студент жастар ортасында шеберлік сабағын өткізді.
Оқу орнының Ақпараттық-имидждік қызметінің жетекшісі Жандар Асанның айтуынша, ТарМПИ-дың 50 жылдық мерейтойы қарсаңында ұйымдастырылған шараға күреске қызығушылық танытып жүрген оқу орнының студенттері қатысқан. «Татами төрінде шашасына шаң жұқпаған балуан волейбол, тренажер және бокс залдарында түрлі оқу-жаттығу сабақтарымен танысты. Ал, күрес залында Елдос Сметов жас балуандарға дзюдодан шеберлік сыныбын өткізіп, бірнеше әдіс-тәсілді көрсетті», – деді ол. Оның сөзінше, студенттер Елдостың әрбір қимыл-қозғалысын мұқият бақылап, айтқан ақыл-кеңестерін зейін қойып тыңдады. Сонымен қатар, спорт шебері жастармен сұхбаттасып, олардың қойған сұрақтарына толыққанды жауап берді. Шеберлік сыныбының соңында Тараз мемлекеттік педагогикалық институтының басшылығы Олимпиада жүлдегеріне оқу орны ұжымының атынан алғысын жеткізіп, сый-сияпат көрсетті.
Есімі әлемге белгілі спортшының әр қадамы кейінгі жастарға үлгі-өнеге болып, олардың көкейлеріндегі үміт отын жағатыны сөзсіз. Себебі, Елдос Сметов дзюдодан 2010 жылғы жастар арасындағы әлем чемпионы, 2015 жылғы ересектер арасындағы әлем чемпионы, 2016 жылғы Азия чемпионатының жеңімпазы. Ал Рио Олимпиадасында 60 келі салмақ дәрежесінде белдескен қазақстандық балуан әуелі ливиялық Элкабиса Мухамед Эльхадиді жеңсе, артынан ұлыбританиялық Эшли Маккензиді және өзбекстандық Диорбек Урозбаевты қапы қалдырды. Жартылай финалда әзербайжандық Орхан Сафаровты бұйым құрлы көрмесе, финалда ресейлік Беслан Мудрановпен күресті. Аса тартысты өткен белдесуде қос қарсылас негізгі уақытта тең шығып, қосымша кезеңде Ресей спортшысы басым түскен еді. Сол бір сәт өзегімізді өртегенімен, даңқты ұлдың күміс жүлдесі біз үшін алтынмен тең.

ТарМПИ Ақпараттық-имидждік қызметі

Сондай-ақ, оқыңыз

Республикалық жарыс жеңімпаздары

Қызылорда қаласында жасөспірімдер мен жас құтқарушылар арасында өрт-құтқару спорты бойынша ұйымдастырылған VІІ Республикалық жаздық чемпионаттың …

Пікір қалдыру

Э-пошта мекенжайыңыз жарияланбайды. Міндетті өрістер * таңбаланған